Mbe burya umurundi aba mumahanga ninde amubabaye vy’ukuri?

Abatari bake (si bose, ariko!) barishizemwo yuko umurundi wese aba i Bulaya canke Amerika, yama yorohewe n’ubuzima abayemwo kurusha mugenziwe ari i Burundi. Ivyo bigatuma benshi mu ncuti n’abagenzi bari i Burundi, bumva yuko bafise “uburenganzira” bwo kwitega yuko iyo ncuti yabo yo mumahanga, itegerezwa kubaserukako mu bihe vyinshi (canke vyose!) bitandukanye. Ivyo vyose mugihe uwuri i Burundi we, ataco akora kenshi– kugira yereke mugenzi we wo mumahanga ko amufise k’umutima.

Ivyo bikaba vyashikirijwe n’umwe mu bagenzi banje baba mumahanga, inyuma yaho anyagiye ivyamushikiye ari i Burundi. Ahejeje, yarambajije ikibazo gikurikira:

 “Mbega burya twe tuba mumahanga ninde atubabaye vy’ukuri?”

“I Bulaya ibifaranga murayora”

• 

Nikimenyamenya, nuko imbere yuko ashika i Burundi, hatabura abamwandikira, bamusaba utuganuke yoza abazaniye.

Mariya (izina ryahinduwe) amaze imyaka itari mike i Bulaya. Arubatse, akaba afise n’abana. Mariya afise incuti n’abagenzi benshi i Burundi. Mu minsi iheze, Mariya yarakubitiye mu gihugu ciwe c’amavukiro, nkuko yama yabikoze igihe cose uburyo n’akanya bimukundiye. Ubuheruka, Mariya yarajanywe n’urubanza rw’umuryango.

Imbere yuko hagera ko afata indege imushikana i Bujumbura, Mariya yaramaze ameze atari make yitegurira urwo rugendo hamwe n’urubanza vyari bimujanye. Mariya aravuga ati:

 “Gukwiza amafaranga y’amatike y’indege; kuziganya amafaranga nzokoresha ivy’urubanza; kugura ivyo ngenda nshiriye incuti n’abagenzi…, ivyo vyose ntivyari vyoroshe ariko vyari ngombwa ko ndabikora.”

Kubera Mariya amaze kuja i Burundi akatari gake, yaramaze kubona yuko benshi bishizemwo yuko: “I Bulaya amafaranga ari kwiyorera”. Ahubwo kandi yuko ayo mafaranga nyene atigera ahera canke ngo abure. Nikimenyamenya, nuko imbere yuko ashika i Burundi, hatabura abamwandikira, bamusaba utuganuke yoza abazaniye. Aho hose Mariya akigora akabikora kugira abanezereze.

Ariko umuntu nkawe arashobora kubura utu dollari 20?

Mariya amaze kugera i Bujumbura, iminsi myinshi yayimaze yiruka mubijanye n’imyiteguro y’urubanza rwari rwamujanye. Ariko naho biruko, ntivyabuza yuko hari abaza kumutura ingorane z’ubukene baba barimwo. Bishitse bigahurirana nuko yaba afise ico yirengagiza, yarafasha. Bidakunze naho akababwira ko ataburyo afise.

• 

Muri ivyo vyose, hari ikintu kimwe catangaje kandi cababaje cane Mariya. Ico naco si ikindi: n’inyifato yabatashobora gutahura yuko Mariya ata mafaranga afise yokubaha. Hakugerageza gutahura yuko Mariya yazanywe i Burundi n’urubanza rukomeye kandi rutwara uburyo bwinshi, hari abatahengeshanye kumwumvisha ahubwo yuko “agize nabi mukureka kubafasha, kuko bafise ingorane nyinshi”. Hari nuwashimye kubaza Mariya ati: “Ariko umuntu nkawe arashobora kubura utu dollari 20”? Mur’uwo mwanya, Mariya yaribajije ati: “koba ari ukutamenya canke ukwikunda kurengeje kuri mu bantu bamwe bamwe?

No mumahanga amafaranga arahera/arabura! Ahubwo twige gushira urukundo imbere

Yaba abarundi baba mumahanga, yaba benewabo bari mugihugu c’Uburundi, bose barakeneraniranye.

Muntumbero yoguhindura ishusho, abatari bake bafise kuvyerekeye ubuzima bwo mumahanga, Mariya arumva neza yuko, abarundi bo mumahanga bafise uruhara runini mubijanye no gusigurira cane benewabo bari i Burundi ibijanye n’ubwo buzima babayemwo. Na cane cane mukubabwiza ukuri yuko mu mahanga atari mw’iparadizo, ko amafaranga aronderwa (kenshi muburyo bugoye kandi buruhishije cane) kandi yuko ayo mafaranga nyene atwarwa na vyinshi kandi ahera!

Kwereka urukundo abari mumahanga

Yaba abarundi baba mumahanga, yaba benewabo bari mugihugu c’Uburundi, bose barakeneraniranye. Umwe wese arafise ico yokorera uyundi, mu ntumbero yo gutotahaza ubucuti buri hagati yabo. Mariya arumva yuko, abari i Burundi bari bakwiye kumva yuko nabo hari ico boha abo bandi bari mu mahanga. Ico naco si ikindi, atari urukundo, ubwambere na mbere!

Urwo rukundo bashobora kurwerekana biciye mu nzira zikurikira:

• gushima, cane cane ivyo bagenzi babo baba babakoreye – kuko kenshi baba babigoreye. Ariko igikunda kwibonekeza, nuko ufasha umuntu, hama akazosubira kukwibuka aruko agukeneye kandi.
• kwibuka rero kubaza amakuru ya bagenzi babo bari mumahanga- na cane cane ataruko gusa umuntu afise intumbero yo gusaba ibi canke biriya. Kumbure haraho wosanga, uyo wundi nawe wo mumahanga ari mungorane z’ubuzima, bikaba ngombwa ko umuremesha.

• 

Mariya arongera kandi agashimikira cane kuvyerekeye:

• kwigorera uyundi. Kuko naho twese tuzi ubukene buri mu gihugu cacu, uwugufise k’umutima arashobora kukwigorera nawe. Kenshi tumenyereye yuko abari hanze aribo umengo “ bategerezwa” kurungikira utuganuke abari i Burundi. Ariko Mariya, siko abona ko vyotegerezwa kwama bigenda. Aratanga akarorero gakurikira:

“ Uwuri i Burundi, ashobora kurungikira mugenzi wiwe wo mu mahanga nk’ipaki imwe y’icayi c’Iburundi. Gutyo ukaba weretse uyundi, yuko umwiyumvira kandi umwigoreye muburyo buke bwawe ufise. Igikuru nuko, biba bivuye k’umutima. Ivyo vyonezera iyo ncuti yawe iba mu mahanga”.

Ukaba wakunze iki gisomwa, ntiwibagire kugisangira n’abandi. Urashobora kugira kandi ico ushikirije aha kuri iyi site canke kuri Facebook: Uruhara rwanje- change begins with me.